梁朝偉同舒淇除咗頒最佳新演員外，並頒發新晉導演獎，最終李光耀憑《暴瘋語》，揮低楊紫燁《爭氣》及黃浩然《點對點》，奪得新晉導演獎。

李光耀獲獎時表示：「真係好緊張，好多人要多謝，多謝父母﹑多謝于冬先生對新導演支持。」佢又話多謝兩位監製幫助佢好多，以及感謝所有非常出色演員，冇令新導演大壓力，反而有安全感，李光耀又感謝女友支持，同時亦感激爾冬陞。

而彭于晏及湯唯負責頒最佳編劇獎，結果由麥兆輝及莊文強憑《竊聽風雲3》奪得。麥兆輝表示要多謝莊文強，寫咗一個好好睇劇本，莊文強則搞笑話：「今日嚟好奇怪，好多人話香港電影死咗，咁今晚咁多人嚟咪好猛？」講香港電影已死嘅，包括陳果，陳果係話，香港電影已死，但香港嘅導演冇死；而成龍就話依家再冇港產片，得「中國電影」。

莊文強謂：「因為香港，我寫呢個劇本。我要多謝香港，同香港人嘅。」麥兆輝就說：「我只想多謝一個人，莊文強。」又感謝香港人。


「新晉導演」提名名單:
楊紫燁《爭氣》
李光耀《暴瘋語》
黃浩然《點對點》

「最佳編劇」提名名單:
陳輝虹、江皓昕、陳果《那夜凌晨，我坐上了旺角開往大埔的紅VAN》
彭浩翔《香港仔》
李檣《黃金時代》
張冀《親愛的》
麥兆輝、莊文強《竊聽風雲3》