當年今日

股壇瀏覽器:健諾傳壓價收集

蘋果日報 2002/06/04 00:00


世界盃開鑼後第一個交易日,恒指收報11359,升57點,成交金額即刻減至62.5億元。市場人士關注中國隊今日會唔會打贏波,多過後市升定跌,相信今日炒股嘅人更加少。
噚日友聯建材(432)與天網國際(577)復牌,前者話畀人知將投資天然氣項目,後者則話會投資藥業,而且兩股都可能會股權易手,刺激股價分別勁升79.5%及63.6%,成交金額分別為1776萬元及583萬元。不過,噚日都冇乜散戶跟玩,全日都係幕後與炒家互傳交波,不過證監似乎睇唔到,未有出黃牌罰佢停賽。
慕詩國際(130)早前乾升至2元樓上,可惜一直都缺乏散戶跟進,幕後炒家似乎冇耐性玩落去,近期股價調整速度相當急。此股噚日跌14.4%,收報1.37元,成交縮至305萬元。咁跌法容咩易跌破1元。

光通信消息不妙
據聞健諾國際(8031)上市後會勁炒,但點知噚日首日掛牌,股價較招股價低13.85%,收報0.56元,成交高達1.079億元。黑客話,此股確係要炒,但就唔係𠵱家,因為上市招股時,公開發售部份超額認購逾140倍,配售時又派得比較散,加上定價偏高,所以須進行一次壓價收集,然後至會開車。健諾主要從事人造腸技術研發,即使研發成功,都睇唔到有太大市場潛力,基本因素有限,不宜戀棧。
光通信(603)噚日停牌休戰,話會公布股價敏感消息,據聞話情況不妙,一定要留意復牌通告。
阿 虎