呢輪流行要機構及公僕瘦身，點知財爺阿松覺得呢個用詞唔係幾好，好似叫人捱餓，又有地獄式嘅意味，不如話「減省程序、增加效率」，咁會較受歡迎，因為佢老兄嘅原意亦都想減少工序，打破官僚。
其實阿松提出嘅改革，好多人都支持，特別係私人機構，都唔知瘦身咗幾耐啦，邊有班公僕有鐵飯碗咁好彩。
阿松喺亞視個訪問中重話自己入咗政府八個月，已經好習慣，其實佢話一入政府已冇問題，反而班同事有啲唔慣有外人做老頂。
既然咁適應，咁阿松又點睇交預算案同以往交功課畀私人機構老闆？
阿松一聽到呢條問題，竟然哈哈哈大笑三聲，話既興奮又有壓力，以前交功課只是影響個人，𠵱家就要多聽意見，平衡各方利益，要全面考慮，當然壓力唔少，因為𠵱家香港水頭唔充裕。至於興奮就在於有機會為港人效力喎，信唔信由你咯。
（圖）阿松做官八個月，已完全適應官場生涯。


E-mail：[email protected]