台灣名嘴吳宗憲噚日凌晨喺台灣消完夜，離開時俾人襲擊，頭、眼、肋骨都受傷，去咗醫院接受治療，縫咗九針，醫生擔心佢有腦震盪，勸佢住院觀察，但吳宗憲寧願噚日再去醫院覆診。
吳宗憲前晚錄影完後，就去咗台北嘅「陶石茶坊」消夜，佢凌晨離開嗰陣，就俾約七、八名拎住鐵器嘅大漢圍毆，吳宗憲負傷去咗國泰醫院求醫，然後一行人再去報案。

右眼視力幾乎零
台灣警方高度重視呢單案件，吳宗憲噚日重覺得身體唔多舒服，所以取消晒啲工作同約會，佢本來要同台灣藝術大學校長黃光男見面，討論攞「榮譽學士」嘅事，之後又要去錄影節目《我猜我猜我猜猜猜》，但節目製作人葉心話：「憲哥本想錄影時開記者會解釋，但他傷得實在不輕，頭皮削一塊、兩個眼睛也腫得幾乎張不開，才被迫取消。」據知吳宗憲最慘係傷到隻眼，𠵱家右眼嘅視力幾乎係零㖭。
吳宗憲噚日接受東森新聞訪問，佢話唔知兇手係邊個同俾人打嘅原因，佢話：「不管是誰，敢這樣做的人，應該有膽出來面對，對我有意見可以告訴我，沒有必要動到我。我想這是身為諧星的悲哀，大家都以為我玩世不恭，我到了四十來歲，我可以大聲說沒對不起任何朋友。」

楊崢將愛慕變歡迎
楊崢早前到德國柏林為新書拍攝封面，佢又逛柏林動物園同長頸鹿合照，重透露自己有豔遇㖭，楊崢話：「我去間有成二百年歷史嘅餐廳，個太子爺一見我就話未見過咁靚嘅中國女仔，即刻送咗八支玫瑰，話代表『ILoveYou』呢八個英文字母，我惟有笑笑口話，應該係：「『WelcomeU』先啱！」