馮仁昭四圍超:向華波一腳伸走持刀賊

蘋果日報 2002/03/25 00:00


向華波同內地女友應紅艷分手後,𠵱家仍然保持朋友關係,前晚馮仁昭同向華波食飯,佢帶咗新女友出嚟,華波話同呢個女友都識咗一年,佢兩個係喺深圳識嘅,𠵱家佢得閒都會返深圳探女友。

戶口頂多得兩萬
華波話早幾日佢同女友經過羅湖火車站天橋嗰陣,忽然有一個男人走埋嚟搶佢女友掛喺心口嘅手提電話,當時嚇得佢女友大叫,企喺旁邊嘅華波立即伸腳踢咗個賊仔落地,原來個賊仔手上重攞住把刀仔,不過佢見華波咁兇猛,梗係走為上着。
華波話諗唔到深圳啲治安會差成咁,所以佢都奉勸香港市民返深圳嘅話,唔好帶咁多貴重嘢,華波話:「我返深圳只會帶一張唔可以透支嘅提款卡,而戶口頂多只有兩萬蚊,咁樣就比較有保障。」

趙式芝男友秘密現身
趙世曾嘅寶貝女趙式芝成立咗個叫「Legacy」嘅義工組織,噚日重身兼策劃同司儀一職,同班青少年喺觀塘遊樂場嘅嘉年華會度玩咗一個下午。趙式芝重神神秘秘咁話男朋友都喺現場支持佢,但就死都唔肯企埋一齊影相,人山人海,馮仁昭都冇本事認出邊個至係佢嘅男友。
翁虹Benz被毀買六合彩
翁虹架Benz房車前日泊喺跑馬地雲地利道,俾護土牆上面嘅大樹塌落嚟壓毀,當時有架的士經過亦被壓毀,好彩個司機冇事。翁虹同馮仁昭講話今次咁好彩,如果有機會應該約埋個司機去還神,佢重話棵樹咁都壓得中佢架車,真係要去買吓六合彩,睇吓中唔中喎。

林建岳搵施南生管數
林建岳入股寰亞之後,都好積極搞戲,最重要係搵到施南生幫佢管數,事關喺鍾再思時代,佢公司盤數都搞到冇乜系統,所以林建岳咪搵向來數口精嘅施南生返嚟公司幫手,而經理人部門嗰邊依然由陳自強話晒事。不過林伯其實都唔多贊成呢單收購,因為用咗成億去收購間公司。

林峯李彩樺人前冇偈傾
林峯同李彩樺(阿Rain)呢對情侶真係好鬼搞笑,佢哋唔單止唔喺記者面前承認戀情,喺班同事面前,都一樣扮到冇嘢咁款。有老友同馮仁昭講,阿Rain同林峯開工休息嗰陣,專登坐到鬼咁開,亦唔見佢哋兩個有傾偈,但偏偏每次林峯收工都唔走住,無他嘅,咪係為咗等埋阿Rain收工,送佢返屋企囉!

向海嵐無緣闖影圈
近排人氣急升嘅向海嵐,最近獲片商垂青邀請拍戲,可惜因為同拍劇時間撞期而未能成事。
向海嵐話:「我知道有人同無綫傾過,但因為檔期問題唔能夠成事,在我嚟講當然覺得可惜啦,因為有機會我都想試吓拍電影,希望遲啲有機會試吓啦!」
Shine受老闆力捧
百代(EMI)簽咗Shine呢對靚仔組合之後,佢哋次次出親嚟都幾受啲妹妹仔歡迎,又真係諗唔到,證明經理人年代老闆邱復生同佢女友葛福鴻幾有眼光。當年老邱一手發掘郭富城、金城武,而近期人氣十足嘅F4都係佢哋捧出嚟,𠵱家又睇中Shine,據知葛福鴻已計劃力捧佢哋。

鍾楚紅拒演哥哥新片
張國榮(哥哥)呢輪好積極籌備新戲,原來早排哥哥同鍾楚紅(紅姑)兩公婆食飯,佢好想游說紅姑復出拍佢執導嘅戲,但紅姑覺得個劇本唔多啱佢,結果冇答應接拍。講真黃百鳴年年都想搵紅姑拍戲,但佢俾紅姑推得太多,近年先放棄,其實紅姑做咗幸福少奶奶後,要佢復出拍戲都幾難。