美國經濟放緩，唔少企業開始緊縮開支，打工仔抱怨得唔到應有報酬時，有網民留言每日只須工作一小時，其餘時間上網玩樂過日辰，仲薪高糧準，羨煞旁人。
初出茅廬的網友PaperChaser在《MSNMoney討論區》中「晒命」，自稱每日返工只做一粒鐘，其餘大部份時間都係喺度玩電腦，就可大賺「easymoney」，仲有醫療、保險福利㖭﹗從事銀行業嘅DavidC.反擊，指打工要「食腦」，而非靠「死做爛做」。
睇唔過眼嘅網友T-Bird_Money回應話，就係因為有呢種好食懶做嘅人，所以產品與服務價格先會愈嚟愈高，而投資喺呢啲公司嘅回報就愈嚟愈差。

初中高職位各不同

不過，亦有人因為工作量過低而另謀高就，網友runewell表示，上班玩樂又有錢𢭃雖然過癮，但長遠來說，累積工作經驗更重要。
或者有人質疑PaperChaser係咪「作大」，天下邊有咁筍嘅工？但網友WeWillBackGowron嘗試為呢種現象解釋，佢話：「大部份企業啲職位架構，初入職嘅基層員工都要很努力工作博上位；當晉升至中層後，佢哋就可將工作分配予其他人，或索性做少點；但若晉升至更高職位時，因責任重大，佢哋嘅工作量又會再次大大增加。」因此，部份美國企業就出現中高層員工「少做多賺」嘅情況。