當年今日

搞親「阻頓」冇好結果

蘋果日報 2002/01/14 00:00


波鞋街Sales「訴苦Sam」收工後又搵大食Jack訴苦,雖然請客到球場附近「石磨坊」食馳名核桃糊作甜品,但訴苦Sam說話中仍有濃烈苦澀味,令人感到生意難做之痛。
「訴苦Sam」話波鞋街舖頭𠵱家除咗靠做出口生意外,啲細嘅就靠國際拍賣網搵食,將行貨掟上網賣畀鬼佬,當中關刀牌特別版最好搵。啲人駁腳搵大陸廠,靜靜雞偷運成批鞋辦上網逐對賣,早排竟然找來批未出街嘅「阻頓」17代,尺碼齊全,吸引外地「阻頓」迷蜂擁上網競投,每對以二百幾蚊美金以上賣出,班細路重好搵過啲大行。
終於引嚟「關刀」總公司注意,向拍賣網投訴批貨懷疑賊贓,終止有關拍賣項目,重傳聞有私家偵探上網扮買家放蛇以圖搗破幕後操控集團。
訴苦Sam話「關刀」好鬼緊張「阻頓」產品,若果一見老鼠貨或假貨出沒就要即刻做嘢,絕不手軟。

主持人:大食Jack
八卦熱報:[email protected]