當年今日

刀仔鋸大樹:轉攻日職聯總入球 - 牽牛

蘋果日報 2006/10/13 08:00


周六日打番聯賽,仲有過百場咁多選擇,又係刀仔鋸大樹時候;日職聯周六有7場打頭陣,由於周中有國家隊比賽,勝負好難諗,不如玩吓總入球好過。
頭場大阪飛腳對橫濱水手,飛腳要爭標,而且入球能力超強,加上水手失波數字都幾驚人,已連續5仗聯賽有失波。飛腳贏波不成問題,不過佢哋近期後防真係失晒暈,連續兩仗輸2:3;今次一於再追總入球「5球」,估飛腳贏5:0、4:1,或者贏波輸盤嘅3:2,都叫做過關。
人人以為日本波一定開大,今次揀大分三神對大阪櫻花,就望入球細;大分三神近5場波,有4次入波少於1球,攻力真係麻麻地。大阪櫻花為求護級,都只望迫和對手,佢哋近兩場攞1分,上仗就迫和心跳1:1。一於博多次總入球「2球」,萬一三神2:0仲有糊叫。
巴黎聖日耳門已經係法甲大毒瘤,主場對弱隊,讓幾少都千祈唔好沾手,真係人見人怕;不過始終係有名氣,就算長期輸盤仍然有人追。今次主場對色當,讓到一球以上唔少得;色當作客唔差,迫和過歐塞爾2:2,不妨再追色當今次又開2:2波膽。
星期日用番場比較穩健嘅賽事守尾門,就係拖連奴主場對基爾禾。睇過拖連奴上仗主場輸畀拉素,真係可以講句攻不銳守不穩,甚有升降機feel;基爾禾因參加歐洲賽而影響季初表現,聯賽至今仍未贏過,不過經過國際賽期小休,有望復甦,今仗一於博客W。
文︰牽牛