當年今日

墳場住宅 - 左丁山

蘋果日報 2002/06/04 00:00


昨日講《齊齊掩耳盜鈴》,例子講唔晒,譬如殺康體局,冇乜反對聲音,左丁山亦唔抗議,但諮詢文件建議拆大球場,以後多用獎券(即係賭啦)來發展體育活動,又是一例。
大球場拆咗嚟做乜,當然係賣地起樓。一位八十歲老人家睇到呢段消息,某日碰到左丁山,大發議論一番:「你哋知唔知大球場以前係乜地方呀?戰前大球場未起,係一幅荒地,叫做咖啡園,內有墳墓無數,日本仔時代,我行過咖啡園,見過唔少屍體。戰後慢慢清除,五幾年在原址興建大球場,用人聲波聲鎮壓住啲天外遊魂,幾十年來平安無事。如果拆咗個球場,起住宅樓,啲住宅風水掂唔掂呀?」
左丁山唔識,無以置評。不過中國人唔鍾意住在舊墳場之上,住近啲都唔高興,左丁山以前買樓,露台望到骨塔,亦俾老人家喝住唔好買。呢樣嘢,鬼子佬就冇乜所謂,某年自己到美國旅行,碰到一位新相識,就係住響墳場對面,佢話貪「夠靜」喎。不過外國地方大,墳場墓碑井井有條,綠草如茵,唔似得我哋啲墳場咁雜亂及擠逼,見石不見草。
八十歲老人或者思想舊啲,現代香港人為咗住屋,可說「見佛殺佛」,勇過柳生一族,邊會怕六七十年前嘅墳場地吖,唯一怕嘅就係掃桿埔冇咗大球場,住宅太過密集,影響樓價啫。