經濟低迷，又非典又失業，但係偏偏便利店同超市就愈嚟愈多生意，今個星期Konami就食正條水，推出《便利商店3》，今集加入咗日本連鎖便利店「Lawson」招牌同入面嘅真實商品，更可開發自己品牌嘅商品，玩得多話唔埋你都可以開間×佳，市價約$310左右。

PS2日本新型號勁過行貨？
下個月推出嘅PS2新型號SCPH-50000，坊間傳言話點勁點勁，搞到好多客都話等埋先買，不過計鐵人話，新型號嘅功能好多人都用唔着，好似逐行掃描功能，但係日本版主機只可以睇2區碟！對應DVD-R又唔代表玩到翻版，都係買行貨機實際啲。

GBA新一集封印之劍抵港
上集難玩到傻嘅《封印之劍》，新一集前兩日已經有得賣，上集限定版炒到七百八百蚊都有價有市，今集限定暫時三百左右就有交易，有興趣好快手入市，唔係斷咗貨，一係就買唔到，一係就要捱貴炒貨。

文：打機鐵人