街市巡場:頌安萬有街市
蔬菜水果最扺買

蘋果日報 2002/04/02 00:00


頌安萬有街市係馬鞍山區內其中一個屋邨街市,今年年中便五歲,相對分別都有超過十年歷史嘅恒安及恒耀街市,頌安萬有街市係較新嘅一個。呢個街市以賣水果平為主,大部分水果都比市價平2-3成。另外,呢度有部分蔬菜都好抵,兩、三蚊都買到。普通雞蛋試得多,有興趣試吓竹絲雞或走地雞雞蛋,都可以喺度搵到。

記者:陳冰麗
攝影:伍慶泉
售價特平 水果檔
呢個果檔賣嘅以合時靚果為重點,選擇又多,大部分水果重比市價略平,去皮菠蘿及香梨市價分別要$6及$7磅,呢度兩者都只售$5;另外,呢度更有水果舖較少見嘅馬蹄,係去咗皮兼以真空包裝,即開可即食,都只係兩個零一包。喺呢度買嘢真係慳番唔少錢㗎!(頌日鮮菓C41B)
當造枇杷$10磅
家陣係枇杷盛產期,市價至少$14,而喺呢度只係$10就有交易。
清香腰芒$10磅
上市無耐嘅腰芒,一般每磅$12-$14,呢度只係$10,足足平兩成有多。腰芒出咗名好食,果核細而薄,果肉甜而帶清香,老人家都會鍾意。
真空包裝馬蹄$10/4包
馬蹄好多時喺菜檔至搵到,果檔較罕見,更以真空包裝,確保衞生,十蚊有四包,每包大概有半磅零重,即開包裝即可食用,食唔晒則可存放冰格內,大概可保存兩星期。
街坊至愛 蔬菜檔
呢度賣嘅大部分蔬菜由兩蚊起至三蚊止,非常抵食,所以呢度經常都有一班主婦圍喺舖面前爭相搶購,揀慢啲分分鐘都無貨㗎!當中最抵食嘅有唐生菜,$3有2斤,青瓜、椰菜花、潺菜一律$3斤,重有小記鍾意食嘅番茄亦只售$2.5咋!(萬福蔬菜C49)
渾圓結實紅番茄$2.5斤
呢啲紅噹噹嘅番茄只係$2.5一斤,而且重有枝連住,靚唔靚一望就知,每個番茄都渾圓又結實,質素有番咁上下。
合時潺菜$3斤
潺菜市價至少都要$4斤,呢度只係$3有交易,而且重係剛上市,合時而又抵食,要食好趁手啦!
襟擺蒜頭$1.5包
除咗蔬菜抵食之外,連蒜頭亦比市價平$0.5,每包只售$1.5。蒜頭唔易變壞,買多咗都唔怕。
凍肉舖 選擇多
呢個凍肉舖佔咗街市內兩個舖位,規模大,賣嘅凍肉種類又夠多元化,較特別嘅有米鴨、沙鯭魚、牛坑腩等,唔係好多凍肉舖有得賣㗎!另外,重有佢哋自製嘅燕子餃子亦係搶手貨之一,不妨試試,唔錯㗎!(利盛凍肉公司C6、C45)
牛坑腩 急凍貨經濟$25包
新鮮牛坑腩每斤至少四十零蚊,急凍貨就經濟得多,斷包出售,每包有磅零,只售$25,相當抵,而且燜腍咗肉質同樣嫩滑美味,同新鮮貨相距不大。
米鴨 貨源較少$20隻
凍肉舖好少見到有米鴨出售,檔主陳生話呢啲米鴨係嚟自上海,貨源唔多,要買好趁手,每隻米鴨都有三磅零重,但只係$20,頗為抵食呢!
爽口燕子餃$20磅
陳生話燕子餃子因為造型近似燕子,所以就有呢個名,係用咗豬肉、沙葛等做成,食落帶爽,滾湯或炒都可以。
雜貨舖 特色貨品
近商場入口就係呢個雜貨舖,賣嘅除咗一般大路乾貨海味之外,間唔中重可以搵到啲市面較少見嘅貨品,今次搵到嘅係細細隻嘅竹絲雞雞蛋,行勻街市內只此呢檔有咋!另外重有一款比竹絲雞雞蛋再細少少嘅走地雞雞蛋,如同一個小乒乓波。兩款同時都係十蚊有十五隻,未試過嘅話不妨買啲試吓,兩者各有特色。(溢發海味雜貨C28)

白雪雪竹絲雞雞蛋$10/15隻
較白嗰款係竹絲雞雞蛋,另一款則係走地雞雞蛋,前者食落較滑,而後者則蛋味較濃及較香,兩者嘅蛋黃都較普通雞蛋紅。兩者售價一樣。