花園街假Ape王

蘋果日報 2002/01/26 00:00


訴苦Sam夜半打電話嚟訴苦,大大聲話唔再着沖涼猿人,想放晒啲猿人衫重難過乜,放上網賣或轉售畀Friend都冇人吼。點解咁大鑊?以前猿人衫大家爭住搶,𠵱家竟然冇人要,係咪太氾濫呢?訴苦Sam話呢個並非主因,鍾意沖涼猿人嘅Fans係真心欣賞佢嘅設計概念,絕不介意太多人着,不過如果假貨充斥就棹忌喇。
訴苦Sam話喺花園街尾有間街舖,唔知由邊度返咗批猿人假貨,質素高到無倫,連專家都分辨唔到,袁仁祥睇過都嚇一跳,重問:「呢批好似真貨喎,唔好陰我!」
批衫最好賣係猿人風褸,訴苦Sam話除經典猿顏迷彩圖案外,連電腦花迷彩都有,八百蚊件好快斷巿,有啲客重誇張到留名等返貨,好似正店咁。批衫Details交足,拉鏈、刺繡、布料都拍住真貨。重有孖Taps虎紋褲同埋「足夠好」衞衣,全部幾百蚊起。
老闆話呢批係真貨貨尾,其實邊處有咁多貨尾?訴苦Sam話:「肯定呢批屬高級假貨,內地廠功力唔差,只要QC好,好過正貨都得!」大家千祈咪上當,謹記買嘢要去正店。
主持人:大食Jack

八卦熱報:[email protected]