當年今日

馮仁昭四圍超:
劉家輝新年祈願 行得走得 - 馮仁昭

蘋果日報 2013/12/31 00:00


武打明星劉家輝因中風導致半身不遂,𠵱家喺療養院養病,日前王喜、樊亦敏、家輝外甥女同大班徒弟以及朋友去探佢,提早開新年派對。劉家輝見咁多人探佢,心情勁靚,狂擦芝士蛋糕、蒸魚、河粉等,胃口好好,最搞笑係王喜同班親友知佢鍾意食芝士蛋糕,就各自買咗,結果有成14件芝士蛋糕,佢食咗一件半已怕怕。
「好想飲啤酒」
王喜日前喺電話度同馮仁昭講劉家輝嘅情況:「聽醫護人員講,佢好努力做物理治療,但太劇烈運動會引致痛楚,所以好考意志。」咁佢意志點樣?王喜話:「好好,仲話好想飲啤酒,想去街,想早啲出院!呢啲都係佢新年願望。」
除咗健康問題,劉家輝同前助手有金錢糾紛,又同老婆仔女感情破裂,避免佢唔開心,王喜探佢嗰陣都避忌唔提,王喜話:「希望佢新一年健康再好啲,可以處理晒啲麻煩,開開心心。相信佢有好強烈意志想好番,始終一代武打明星,希望自己行得走得,身體健康。」
撰文:馮仁昭
empty
王喜上周六同樊亦敏等人到療養院探劉家輝,令佢相當開心。
足本收睇《亂噏24》x劉嘉玲; 鄭秀文@杜琪峯再度登場!
周一至周五《亂噏24》約定你: http://bit.ly/appletalk24