當年今日

  民建聯請槍教易容術 - 李八方

蘋果日報 2003/12/28 00:00


民建聯自從區議會一仗大敗之後,所謂痛定思痛,第一時間請教各方友好,學者同埋精英,真係好似新主席馬力咁講──開門建黨。
據聞,班軍師臨危嘅建議,有不少民建聯都受落,希望可以即時改變形象,頂住一陣,再從長計議。軍師們認為,民建聯絕對有生存空間,只係以阿董為首嘅特區政府太冇義氣──有事鍾無艷,唔夠票就搵民建聯;無事夏迎春,同民主黨拍膊頭扮民主。
唔怪得馬力上任後冇幾耐,就批評當局喺區選嘅時候冇幫手,如果派幾個較高民望嘅司局長出嚟助選握手,葉國謙未必會輸。咁梗係指煲呔、唐少同埋冬冬啦,至於詩姐姐、馬仔,肥何、林D9佢哋就多謝夾盛惠咯。
軍師又認為,民建聯要掌握港人崇尚精英嘅風氣,你民建聯一味扮基層,扮工人階級,班中產同老闆使鬼聽你支笛咩。民建聯佢哋唔明余若薇點解人氣急升,所向無敵,無他嘅,余若薇係大狀,滿口流利英語,寫得、講得、重睇得,又有品味,雖然品味呢樣嘢唔係咁易學,但所謂知己知彼吖嘛,至於百戰百勝就要睇民建聯嘅易容術有幾高明啦。



傳真︰2623-9278
電郵︰[email protected]