教車師傅爆料
  霆鋒學車3堂走人 - 李八方

蘋果日報 2002/07/29 00:00


藝人謝霆鋒近日接二連三炒車,連八方都想知佢手車係咪真係咁弱。八方千辛萬苦搵到曾經教過霆鋒揸車嘅教車師傅陳德榮。七十一歲嘅陳師傅坦言只係教過霆鋒三個鐘,原因係「可能佢嫌我架車太舊啦,踩極油門都唔去。」

霆鋒有禮貌又聽話
陳師傅部車係五年前買入嘅「萬事得121」,比起霆鋒近日成日撞嘅法拉利F355,又確係弱啲。陳師傅憶述兩年前某日:「我都唔知邊個介紹,有人打電話嚟話要學車,到個學生出現嗰陣至知係霆鋒。記得佢每次學車,都係有保母車接送;每次都係傍晚七點學車。」
佢形容首次與霆鋒見面時,覺得霆鋒一啲都唔反叛、聽教聽話、好有禮貌。「佢成日都師傅前、師傅後。係人都知佢喺加拿大已經識得揸車,所以佢一上車就知道點舞架車,只係有時要我提佢望吓左、望吓右。」不過唔知霆鋒嫌佢長氣定嫌架車舊,總之學咗三堂就走人。至於後來跟邊位師傅,陳德榮就話唔多清楚。

炒車唔應該賴師傅
當年學車每個鐘頭公價收150蚊,今時今日收費已下滑到80蚊一粒鐘。陳師傅話:「我冇因為佢係大明星就收多啲、或者收平啲。佢每次學完車就畀150蚊。」對於呢個舊學生不斷炒車,陳師傅強調一般學生無論跟過邊位師傅,考牌後出事,都唔應該將責任與師傅拉上關係。


傳真︰2623-9278
電郵︰[email protected]