女排大獎賽澳門站花絮

蘋果日報 2002/07/29 00:00


全部爆滿難搵位
噚日女排大獎賽澳門站最後一日,因為有中國對巴西呢場爭標戲碼,澳門綜藝館全場五千個座位就全部爆晒,現場氣氛相當熱烈;有部份球迷可能因搵唔到靚位,索性企喺通道或者坐喺樓梯睇波。

「巴西姑娘」獨憔悴
過往大獎賽個人獎項都有太公分豬肉嘅情況,不過今年有啲唔同,中國女排就連取三獎,德國亦有兩個個人獎;反而巴西就一個獎都攞唔到,班巴西姑娘自然難掩失望之情。

「女孩啦啦隊」搞氣氛
德國噚日喺一點開波嘅頭場只用咗一個鐘多啲就解決咗泰國,但尾場中巴之戰要三點半至開波,賽會就安排咗個大班小女孩喺呢個空檔同完場後跳舞助興,搞吓氣氛,等班現場球迷唔使齋坐咁悶。