近期大台劇《鐵探》熱播，筆者唔係大台FANS，所以都無睇過，但警匪片呢類題材，令筆者諗起一個場面，就係警察上門拉人，仲會講一句「你有權保持緘默，但你所講嘅嘢有可能會成為呈堂證供」。

作為執法部門之一嘅證監會，雖然都有權上門突擊搜查，但對於被調查或者協助調查人士，證監會更常用嘅係發出會面通知，首先叫得做通知，字面上就見得出係要求，基本上無得拒絕，除非有合理解釋，如果唔係就係刑事罪，有機會因唔應約而要罰錢兼坐監。

更加重要嘅係，證監會執法人士晌會面嘅時候，係唔會同你講你有權保持緘默，並唔係佢唔記得，而係因為你無權保持緘默，佢問你就要答，不過好嘅係，可以傾傾吓隨時返屋企，約過第二日再答都得嘅。

亦都由於佢問你就要答，所以呢啲會面答問隨時有機會由協助調查人士變咗做被調查人士，亦由於講嘅嘢有機會成將自己入罪嘅證供，所以法例上亦會有條例保護返嘅，雖然唔係自動擁有，但亦有避免所謂自我入罪嘅權利，講到底有麻煩嘅時候最好都係搵個律師幫手。

散子

【六四30】守住歷史 拒絕遺忘
https://hk.adai.ly/zdzKtt2RiW
---------------------------
星期一至五晚上10點半
《動腦Q》Let's Q the money！
http://bit.ly/2QW8LcIr