滙豐喺觀塘嘅分行遺失伺服器，搞到班客仔嘈到拆天，作為管理層面對啲咁嘅情況，EQ好重要。咁啱滙豐亞太區主席鄭海泉噚日出席一個兒童情緒健康課程活動，有小朋友問佢，同人鬧交或者唔開心會點做？
鄭大班就話佢會先「谷住」自己，因為呢個時候個人會好躁好𤷪，好容易就會亂咁講嘢。
佢又叫小朋友有咩唔開心，最好就同爸爸媽媽講，但佢唔好彩，雙親都已經唔喺度，所以同自己最親密嘅人講。
邊個係鄭大班至親密嘅人？咪就係到場撐老公嘅鄭太囉，大班咁直接示愛，搞到鄭太鬼咁開心。唔知觀塘分行單嘢，鄭太點安慰老公呢？