網誌日期：2008-09-08
通往倫敦東區地鐵最後數站，你會發現身邊乘客越添平民化味道；那裏嘅球會韋斯咸，近年卻欲再發圍高薪簽入貴價球星，但始終格格不入，畀我選擇蘇拿定鄧納東尼為下一位新帥，答案顯而易見。
94世界盃後，還記得當年哈利列納領軍嘅韋斯咸，狂簽有名氣但日走下坡嘅歐洲球星，例如羅馬尼亞嘅拉度斯奧及葡萄牙嘅富達，可惜球會仍富不起來；反而之後嘅一隻臭馬廸肯尼奧，卻令韋斯咸聲名大噪。95年，一個伯金，令英國人明白歐洲人踢波如表演藝術；一年後，以近三十之齡降臨車路士嘅意大利小巨人蘇拿，以強橫永不言敗嘅鬥心，足令門戶之見甚深嘅英人敬畏。結果，伯金及蘇拿成為英超嘅傳奇。
韋斯咸要殺出一條血路，早唔應該簽蘇蘭奴及龍格保等走下坡之流；古比士利離開，年輕時心高氣傲嘅闊少鄧納東尼，也未必係合適替補者；讓我選擇，打甩門牙帶血吞嘅蘇拿較為實際，英超盛勢也需要唔同聲音，學唔到曼城車仔，打爛仔波，有時也值得欣賞。
http://hk.myblog.yahoo.com/appleballmen/
（逢周一至周五見報）
蘋果波神個人資料
英國足球狂熱，願能年年去朝拜。