當年今日

許茹芸老公叫Mr.Big 吳克羣:相信他身上有東西非常Big

蘋果日報 2013/12/31 06:00


39歲嘅許茹芸日前公佈已經喺11月8日與同齡韓籍老公崔栽誠登記結婚,許茹芸噚晚喺深圳舉行演唱會,老公專誠飛過嚟捧場,楊采妮夫婦、梁詠琪攜老公Sergio、媽咪及阿姨捧場,吳克羣同張韶涵就擔任表演嘉賓。

吳克羣喺台上同新婚許茹芸手拖手合唱,之後吳克羣話:「唱這首歌時很驚,要拖住你,不知道台下會否有人不開心,與你唱歌好像搶親一樣,但搶不了。」許茹芸即笑言:「你也不差,你有好多新聞,澳門和香港,你幾時結婚?」吳克羣就話未有計劃,許茹芸就話:「快了,快了。」吳克羣又講:「台下的Mr.Big相信是好男人,他應該有很多好處,如果不是你也不會揀他,相信他身上有東西非常Big,今日來好似參加婚禮,好開心。」許茹芸即多謝吳克羣到場分享佢嘅喜悅。

之後許茹芸獻唱《月亮代表我的心》送俾老公,而螢幕就播放了佢嘅兒時片段,同時亦細說父母嘅愛情故事,佢話:「父母的愛情令我對愛情好相信,每個人都有訂情歌,這首是我父母訂情歌,今晚同大家分享好多愛情,愛情就好像拼圖一樣,心目中一定留個位置,最後會搵到最後一塊拼圖放上去,那個他就會出現了。」佢又問粉絲覺得自己最近有咩唔同,台下粉絲大讚佢變靚咗,但佢就聽成發肥咗。