中國羽毛球手諶龍喺里約奧運擊敗「大馬拿督」李宗偉，贏得男單金牌，但佢喺奧運後長時間處於休戰狀態，多次退出比賽導致世界排名下滑，截至4月27日佢喺世錦賽積分榜排第9，落後隊友石宇奇、田厚威同林丹，失去自動晉級正賽嘅資格。

不過，國際羽聯喺周五宣佈頒發外卡畀諶龍，等呢位28歲中國球手落實可以出戰8月21至27日喺格拉斯哥舉行嘅世錦賽！國際羽聯喺官方Facebook解釋：「諶龍係里約奧運冠軍，仲係世錦賽嘅衛冕球手，考慮到佢嘅實力同埋叫座力，所以頒發外卡畀佢出戰世錦賽。」