阿媽教女最好嫁個鑽石王老五，不過阿媽通常口不對心，原來好多媽咪覺得鑽石王老五唔係乖仔。德福廣場同香港婦女中心協會趁母親節做民調，訪問咗約500位母親，選出政界、商界、運動界、社福界同演藝界乖仔乖女，其中商界乖仔人辦係金管局揸fit人任志剛，佢年薪千萬，31%阿媽讚佢乖仔理所當然；至於小小超李澤楷，只有8%母親話佢係乖仔，超人唔知點睇？

正所謂養兒一百歲，長憂九十九，小小超想賣電盈、幫Isabella打官司，鋪鋪都全城矚目，如果有個不時搞出頭版大新聞嘅乖仔，做父母嘅隨時有「驚喜」，難怪咁多媽咪認為佢唔係乖仔。政界方面，22%阿媽認為前任政務司司長陳太最乖女，因為佢侍母至孝，僅一成多受訪母親認為煲呔係乖仔，唔通做阿媽嘅呷醋佢只孝順「阿爺」？
運動員方面，「風之后」珊珊眾望所歸係阿媽心目中乖女，不過阿媽多數講一套做一套，如果自己個女以玩風帆為終身事業，阿媽實鬧。嫁得金龜婿嘅朱玲玲最乖女冇人異議，奇在佢係社福界代表；劉華《獵鷹》年代已經係全民乖仔，下次唔使選啦。