之前有網民喺西班牙，偶遇女星全智賢陪老公去巴塞隆拿睇波，暴露佢係「跟得太太」嘅性格。近日再有相關人士爆料，話全智賢係一個以家庭為重心嘅賢妻，指佢如果接到外國嘅廣告時，都會提議盡量喺韓國進行拍攝，而且佢唔鍾意一個人離開韓國超過四日，因為想多啲陪老公同屋企人。就好似最近女神同謝霆鋒合拍一個廣告，原本廣告商希望能去台灣拍攝，因全組製作團隊都係台灣人，但全智賢因為唔想又離開韓國三天，冷落老公，所以堅持一定要在喺首爾拍攝先至肯接拍，廣告商只好遷就。

全智賢嘅經理人公司就解釋謂，全智賢唔係太鍾意國外開工，係因為佢已經習慣同熟識韓國嘅拍攝模式，故為保持作品嘅質量，先至會選擇喺國內拍攝，但佢都會視乎情況而接受海外拍攝嘅邀請。

雖然經理人公司冇話全智賢鍾意留喺韓國拍攝係因為家庭原因，但睇到近日全智賢同佢老公啲甜蜜相，都知佢係一個識得維繫夫婦關係嘅高手。