滙豐（005）除息，淡友借勢出擊，但用到市場憂慮美國聯儲局下半年加息作為造淡藉口，趙飛雲就有些少始料不及，其實美國經濟係咪強勁復甦重未話得定。
港股噚日大跌186點，收11036，不過成交金額61億元，則反映沽壓唔算太大。趙飛雲早前升市冇乜動作，主要就係預咗大市會有調整，上個禮拜重講過當恒指吻別50日線時才追入，不過男人始終急色，忍唔住先「偷吻」新地（016），雖然曾經有錢賺，但終於要坐艇。

守50日線重組升勢
恒指50日線目前喺10938，恒指噚日低位10996，其實都已相當接近，如果今日長實（001）及和黃（013）業績唔係出乎意料差，估計恒指50日線可以守得住，然後重整升勢。
中移動（941）公布業績後，唔少大行叫人吸納，但愈係叫買就愈係腳軟，噚日再跌1.6%，收24元。由公布業績前高位25.75元計，已跌近7%，23.60至23.90元水平估計有支持，手上冇貨可以諗一諗。