當年今日

勵志!八両金月搵18萬
大陸撈得掂掃4層樓

蘋果日報 2016/10/23 05:20

金融風暴八両金八両仔八両菜網絡電影

61歲嘅八両金,97年經歷金融風暴,經濟陷困境,99年嘅時候婆八両菜就走佬,八両金一個人照顧住囝囝,慢慢生活開始上軌道,昨日仲有雜誌訪問八両金,原來佢喺大陸撈得好掂。

八両金指o依家主力喺大陸拍網絡電影,仲話今年有5、60套網絡電影搵佢拍,佢就接咗11、2套,其中仲有啲有成2千萬點擊。除咗拍網絡電影之外,八両金仲有唱下歌搵下錢,佢話自己唱三首歌已經有6、7萬人民幣,一個月做3場,都搵到18萬人民幣。

o依家搵到錢,八両金對屋企人都好咗,仲喺訪問中大爆土豪金句:「請工人照顧媽媽,同埋個仔,都用唔到6萬。」「自己一個月使3、4萬。」、「最少都搵到18萬。」又話最近喺大陸都買咗3、4個單位,遲啲等阿仔大個咗,就買層樓畀個仔。

八両金仲話,囝囝今年21歲,師拜潘美辰學唱歌。依家八両金上大陸登台或者出TV Show時都會帶埋個仔,睇嚟八両仔已ready子承父業。八両金話,自己樣衰,寫佢咩無所謂,只希望大家對個仔手下留情。八両金又稱,之前已和解的前妻,早前因為有啲報道,再次離家。

如果o依家畀個機會大家再揀一次,八両金個樣可以月入18萬,你肯唔肯?