當年今日

四太14億大手筆買地
做埋發展商起屋

蘋果日報 2016/10/23 05:20

超盈信德中心超欣星光行四太梁安琪

四太梁安琪大手筆出資幫超盈、超欣置業,有咁好父母幫手做生涯規劃,真係好幸福!

其實四太一向都有買賣物業嘅習慣,已經縱橫地產界廿幾年,絕對稱得上係老手,佢早期除咗投資信德中心、星光行呢類寫字樓,仲買入過好多豪宅同地舖。淨係計四太喺香港嘅單幢物業組合價值,就已經超過300億,如果加埋海外物業,資產價值就過千億,令好多人望塵莫及。

上年初,四太仲成立咗私人投資公司尚嘉(L'Avenue),由前恒隆地產(101)執董吳士元擔任行政總裁,至今加加埋埋用咗成34億入貨,包括以5.48億元奪得元朗新潭路洋房地段,以及14.01億元投得屯門青霞里官地,由投資者變埋發展商自己起屋!

但唔好以為四太起屋係新丁,佢12年嗰時就將山頂貝璐道6幢三層高獨立屋,改建成4幢洋房,升值約9億元。四太最犀利嘅投資,就係05年以27億收購中環娛樂行 ,持貨11年,現時娛樂行估值超過80億,淨係睇賬面都賺50億!