飛哥空降立法會，好似揸住架太空船登場，乾冰煙霧，電光橫掃，終於肥彭上身，君臨天下，民建聯葉國謙口都窒埋，叫佢做「李鵬飛議員」，俾大飛一鋪清晒袋。

若然係假一早否認
中聯辦喺當晚好夜至發表聲明，好明顯係處於守勢，一字不敢再提「陳姓京官」問候恐嚇大飛妻女嘅事，只係死死氣重申香港有「言論自由」。中方今次玩大咗，飛哥嘅指控，有斤有鏹，對方自己心知肚明。
有消息人士分析：名嘴封咪事件，絕非突然。最早就係由親中報刊同時爆出江澤民喺軍委發表機密講話，炮轟香港名嘴，跟住特區班瞓身喉舌就揸住「江澤民講話」，點名大班毓民等人為「兩支咪」。
老頂講話，即是最高指示，非同小可，若然係假嘅，按照以往慣例，中方一早就會聲明否認，但一直唔出聲，咁特區嘅親中各層勢力，就梗係收到聖旨，自動埋位，愛國黑社會加入，於是卒之演變為三大名嘴封咪，飛哥老婆同個女遭到特別點名重點「問候」。
今日，大飛受嚇事件終於升級為國際政治醜聞。全世界都好奇怪，點解胡溫新政，講「以人為本」，「貼近群眾需要」，原來貼得咁近，貼到落李鵬飛老婆同個女嘅面珠仔。
至於飛哥，經此一役，亦升級為超重量級政治家人物，消息人士指出，若然佢會同大班、毓民，一不做二不休，行出嚟直選，冇錯或者會「唧」咗民主黨企隊尾拉艇邊嘅一兩個咖哩啡，不過磅數超勁，若然加埋長毛，再夾埋四十五條關注組嗰班大狀，自我洗牌，就會為民主派勢力注入新面貌，立法會就會好睇好多。