由少爺占同當奴組成嘅「艾粒」，雖然之前曾經試過入紙申請紅館檔期，但就唔成功，等咗咁耐，今日佢哋喺ig公佈，嚟緊下年4月，艾粒可以踩上紅館舞台開騷喇。

終於可以踩上紅館開騷呢件事咁值得高興，所以艾粒今次就搵嚟「宇宙最強」嘅甄子丹幫佢哋拍片宣佈，片段開頭，丹爺先講笑話佢哋又再申請失敗，仲同佢兩個講：「唔好意思，下次先，大把機會。」跟住當奴就問丹爺可唔可以幫手（申請），點知丹爺話：「你估紅館我開咩…玩你哋咋，恭喜你哋啦，申請成功呀！」，不過當阿占開口問丹爺到時可唔可以做佢哋演唱會嘉賓時，丹爺就大笑咗幾聲，然後講咗句「bye bye」就走咗，而當奴就一臉疑惑咁問阿占：「咁即係得？如果唔得佢唔會笑o架？」

今次入紙申請紅館檔期成功，阿占開心地話：「好開心，因為兩年前都抽過一次，抽咗成年都抽唔到，之後就放棄過，做咗伊館、麥花臣，今年終於抽到，首先要多謝容祖兒放番個期出嚟。」

而阿占話要多謝楊千嬅幫佢哋拍片嘅同時，亦要多謝丹爺：「極之多謝丹爺肯幫我哋拍片去公佈呢件事，因為佢真係得5分鐘時間，5分鐘後佢就要上飛機同老婆去度假，我諗因為佢知道我叫甄子康，佢又叫甄子丹，大家都係姓甄，所以好肯幫我哋，唔知到時佢會唔會真係出現喺我哋個騷度？」

精選娛聞，喺晒《娛果》
http://fb.com/appledailyent