Miss大佬帶紅不良學生
金毛平仔揮低w-inds.攻陷少女心

蘋果日報 2005/05/20 00:00


收視爆棚嘅日劇《我Miss係大佬2》唔止令日本女星仲間由紀惠嘅人氣更上一層樓,重帶紅埋劇中嘅一班男角,喺劇中扮演不良學生嘅小池徹平最近喺偶像雜誌《JUNON》舉行嘅「最喜愛男仔樣貌」選舉入面,竟然打低w-inds.主音橘慶太同成員千葉涼平等成為冠軍,而同劇嘅龜梨和也同赤西仁亦齊齊登上十大。
可愛娃娃臉
新一期日本偶像雜誌《JUNON》搵咗一千個少女讀者選出「最喜愛男仔樣貌」,結果喺《我Miss係大佬2》入面染咗金髮嘅十九歲青春男星小池徹平,以六百六十七票成為冠軍。雖然佢喺《天體觀測》同《水着少年2》等日劇入面都係做配角,但唔少女fans都話徹平個樣好cute,擁有好似天使嘅babyface,所以投佢一票。
一齊演出《我Miss係大佬2》嘅兩位KAT-TUN成員龜梨和也同赤西仁亦分別排第六同第七位,而近期成為日劇搶手貨嘅《水着少年2》男主角市原隼人獲選第二位,緊隨其後係第三名嘅w-inds.主音橘慶太、第四位嘅w-inds.成員千葉涼平,而另一位成員緒方龍一就排第十二位。
木村梗頸四
此外,該雜誌亦叫讀者選出「最喜歡的二十五歲以上男人樣貌」,福山雅治奪得第一位,第二、三位分別係小田切讓同藤木直人,而木村拓哉就慘做梗頸四。