新一屆日內瓦車展將會喺3月初舉行，據聞喺今屆嘅會場上，將有多款新車展出；當中平治車廠，除會展出我哋曾經介紹過嘅A210Evolution外，更會於場內展出新一代CLK車系，實行吸引更多車迷注意。
先從賣相而言，新CLK首予人嘅觀感係酷似新款CL跑車，其中圓渾嘅車身線條及車首造型，就最能將呢個特點展露出來；另外，採用與C-Class相似嘅頭燈組合，以及一組闊大嘅跑車胎軨配搭，一分跑車個性可謂表露無遺。而車廂配搭亦十分齊全，除有真皮座椅外，更備有高級音響及恒溫冷氣配搭，使用時亦見方便。
喺新車嘅多台引擎配搭當中，部分型號嘅馬力輸出較原來增加咗約27匹，而扭力輸出亦約有15%嘅增加，加上全新嘅懸掛系統，因而令新車可有不錯嘅性能表現。另外，屬旗艦級嘅CLK500及CLK55AMG，馬力輸出分別為306匹及367匹，而0至100公里加速度更只需6.0秒及5.2秒，有如此強勁嘅性能表現，定能滿足一班追求速度嘅車迷㗎。有興趣嘅朋友，不妨拭目以待喇。