朋友傳來一份據說係德國駐港領事館fb專頁一個專欄「每週一字」，介紹一個字，方向Direction，好簡單啫：Bayern liegt im Süden Deutschlands巴伐利亞位於德國南方，Bavaria lies in the south of Germany。
德國人都幾幽默，居然趁住特區政府教育局局長楊潤雄講解「香港位於中國南方」之際，玩吓香港式「抽水」，唔知楊局長會唔會批評德國人用詞唔夠明確呢？左丁山讀新亞時，為咗想步經濟系內教授後塵，去德國讀博士學位，特登選修德文，點知港大畢業嘅女教師評分苛刻，全班大部份攞個D，包括左丁山在內（同期崇基德文科由德國人教，幾乎個個攞B以上），係左丁山讀大學四年之最低分數，幾乎打窒條氣。點知因緣際會，畢業後考政府工，次次肥佬，見英資洋行工，冇一次掂，引起中大就業輔導處關注，召去問話（因左丁山係中大就業輔導委員會第一個學生代表），跟住介紹去考西德領事館一份研究員工作，哈，居然考到喎，月薪二千，仲勁過AO，開心之餘，立即去哥德學院報讀德文，然後申請德國DAAD獎學金，點知道主事者就是領事館之「文化領事」，佢黑住塊面話左丁山有conflict of interest，不可以申請DAAD 。於是留德夢碎，之後轉去留泰。
德國人做事認真，德文講究邏輯性排列，甚為機械，只要肯學習，不同事物人之gender，如der、die、das及明白基本公式，不算太難學，不過開始學習之時就確係幾辛苦嘅。德國人唔通唔知「位於南方」嘅意思咩，當然知啦，係跟特區政府開吓玩笑而已。
楊潤雄局長係九龍華仁、香港大學畢業生，有墨爾本皇家理工大學MBA學位，係專業會計師，算是標準番書仔一名，中文好可能係中學程度，平時點會關注中文吖，「位於中國南方」呢一句，邊會在意注意噃，更唔會諗到其他涵義。但佢嘅副局長係蔡若蓮，原是左派中學校長，浸大中國語言學士及文學碩士，中大語言學碩士，對中文好有認識嘅啫，分分鐘係蔡校長嘅主意，累親楊局長嘅啫。你估當初有人指點林鄭搵蔡若蓮做教育局副局長，係無的放矢嘅咩，現在咪見真章囉！連香港位於「中國的南方」都話有問題，顯然係「打港獨心態」走火入魔，驚住學生認為香港不是中國領土，假如改成「香港是中國南方的一個城市」，蔡副局長就收貨嘞！