「鬍鬚弟」睇完上次篇荷蘭啤鞋盒慘被收買佬當爛鐵變賣嘅報道，深表贊同。佢話：「𠵱家好多大公司想搞Crossover宣傳，可能定錯Target（目標），所以搞得唔好。例如有隻啤酒近幾年經常搞換麻雀同手提電視就搞得唔錯，每次都搞到通宵排隊，全因為目標正確。𠵱家隻荷蘭啤搞鞋盒同公仔，想打年輕人巿場唔係唔得，但香港班街童就唔係個個鍾意儲公仔，所以反應一般；我寧願搵班創作人嚟設計骰盅重夠生鬼，起碼客路較闊。其實同類型宣傳，要數早排日本百事×APE就搞得最出色，或者早幾年香港可口可樂×滑板舖都OK。點都好過𠵱家出鞋盒或出啲造型咁古怪嘅公仔吖。聽講呢隻公仔𠵱家喺拍賣網上反應好差，原來之前咁多人換，全因為有人放風話網上有得炒，所以班網上炒家個個都走去入貨，𠵱家班炒家終於坐晒艇。同時隻公仔喺網上冇人吼，世界各地都有人睇到，對隻啤酒牌子亦有負面影響。所以話搞Crossover真係要小心先得。」

主持人：大食Jack
[email protected]