我諗我對Dennis有好感，見到Pinky隻新杯同我收到嘅咁似，我唔開心！但係話晒大家係同事，又唔係識好耐，貿貿然放感情落去好冒險喎。而且佢肯飲Pinky嘅湯，又同時對我咁好，我開始諗佢係啲花花公子。
今日有同事LastDay，律師樓一班人去飲茶Farewell，Pinky特登揀咗Dennis隔籬坐，我睇到黑面！食到尾聲，大老細慣咗煲番支煙，Dennis竟然夠膽叫佢唔好食，佢話睇過研究，飯後煙嘅毒素係平時吸十支煙嘅總和。因為飯後腸胃郁動同血液流量比平時快，煙內物質就更加容易透過血液進入人體，因此對健康影響好大。全場冇人敢加把嘴，至於老細，當然最後照食可也。
四點幾，有同事嚟旁敲側擊，問我同Dennis嘅事！睇嚟已經有謠言出現。最意外嘅係，Dennis主動約我聽晚食飯，我應該點做？
（四）