求驗客手記:「神經刀」癲去墨西哥 - 求驗客

蘋果日報 2007/06/12 00:00


巴夫斯無論喺球場內外嘅言行舉止,永遠都咁出人意表,帶少少神經質,「神經刀」3個字啱晒佢。收到消息,呢位過氣法國門神加盟墨西哥球會尼加沙,如果係真,又係「人做我唔做、殺出新血路」之舉。唔知佢會唔會成為另一隻「花蝴蝶」呢?
36歲已怪行多籮籮
巴夫斯以前嘅神經舉止,包括不時扯高條褲,又試過向球證吐口水;講打波,佢平時幾穩健,但有時無厘頭出迎。當年佢喺歐聯曼聯對拉科魯尼亞時出迎「鏟草」,俾卓斯坦射入空門,相信球迷記憶猶新。
巴夫斯就快36歲,通常歐洲球員養老會揀美職、澳洲A-league或者中東球會落班,去墨西哥養老就聞所未聞。尼加沙會長宣佈已成功羅致佢,但巴夫斯經理人又否認,亦真亦假,真係都轉會都騎呢過人。
墨西哥最出名係乜?除咗係當地原居民嘅民族服飾同舞蹈外,一定係Taco(墨西哥捲餅),而巴夫斯最近嘅心情、舉止,就好似Taco嘅調味料咁,酸酸辣辣。所謂「酸」,係指佢之前效力嘅南特,喺法甲包尾;至於「辣」,係指佢季尾同球迷打交後,怒氣沖沖同球會解約,夠狠夠辣。
轉戰墨西哥尼加沙
墨西哥聯賽水準唔差,而尼加沙周不時踢南美自由盃,假如巴夫斯真係去墨國發展,應該有作為;再講,以佢嘅出位作風,應該會好似當年鍾意着七彩衫,綽號「花蝴蝶」嘅甘保斯咁,為墨西哥球迷帶嚟娛樂。
empty