袁人祥呢排愁眉苦臉，以前做裏原宿叔父時留落嘅羊咩鬚，家陣反而令佢變得欷歔，聽講因為同呢排水貨生意一落千丈有關。
袁人祥話𠵱家班𡃁仔買件四、五百蚊件猿人Tee都要左度右計，點及以前兩千蚊件Tee反而爭住畀錢，因為𠵱家格價太易，只要上網一Check，就知有冇買貴嘢，𡃁仔客點肯速磅？
惟有諗計搶生意，袁人祥話北角猿人正店呢排就谷緊營業額，預備咗近百件原裝手印Tee送畀買嘢最勁頭一百個客，並冇刻意宣傳，只係個別通知。呢招可謂打殘水貨佬，水貨捧場客寧願等正店返貨先幫襯，橫掂數量有成百件又冇乜人知，話唔定買兩三千蚊嘢已可博到件手印Tee。水貨舖又點會好生意？唔怪得袁人祥爆料時兩眼濕濕，相信係啞仔食黃連，有苦自己知。
聽講𠵱家百零蚊件Tee擺喺旺角都好滯，就算係香港嘅原宿設計圖案都係咁話。水貨滯銷，自己出品反應又一般，袁人祥最近處於谷底。相信佢已積極部署，準備暑假大翻身，到時必有好戲。

主持人：大食Jack
八卦熱報：[email protected]