當年今日

靚女運動 論論盡盡
馮仁昭四圍超:奀妹攀石專人托躉

蘋果日報 2003/08/25 00:00


傅天穎(奀妹)、溫碧霞(Irene)、繆非臨、湯盈盈、Rosemary前男友Gordan同馬浚偉等,噚日喺大埔超級城出席慈善感官嘉年華,重大玩沙灘排球、射籃球、攀石同爬麻繩等。

溫碧霞着裙上陣
其中奀妹玩攀石時,為求向上爬而不顧儀態。唔知係咪奀妹太過高大,見佢爬得好辛苦,重要下面嘅工作人員用手托佢上去,搞到佢嘅巨躉原形畢露。
而繆非臨玩攀石時,表現得非常投入,但因佢着嗰條褲太薄,令到佢內裏嘅T-back若隱若現。
喺眾多女星中,以Irene嘅衣着最搶鏡,黃色bratop外加紅色裙,再襯埋白色長靴上場打排球,不過就因為佢着住裙,所以先避得過玩攀石。

《龍咁威》收得擬添食
鄭中基主演嘅電影《龍咁威2003》三日票房收三百七十幾萬,聽聞已經有院商想搵黃柏高開拍《龍》片續集,噚日Paco喺電話度話:「等聽日同院商開咗會先決定,不過套戲每日可以收過百萬,我真係冇諗過,所以我好開心,證明鄭中基走喜劇路線,觀眾已可以接受。喺未來日子,我肯定會繼續捧佢成為新一代喜劇紅星。」
古巨基畫畫𠱁細路
古巨基噚日喺尖沙嘴出席活動,其間重喺小朋友面前畫畫,𠱁得一班小朋友非常開心。佢話五、六歲嗰時已經諗住第日大個會做畫家,結果願望喺今年達成。佢鼓勵啲小朋友參加多啲健康活動,唔好將時間浪費喺打機度。

成奎安見靚女怕醜
近年嚟好多香港藝人都北上拍廣告同登台做騷𢱑銀,就連大儍哥成奎安亦唔例外。前晚大儍哥就去咗江西,擔任一個名為「2003年中國南昌新絲路模特兒大賽」晚會嘅客串主持。平時個樣好鬼惡嘅大儍哥,見到同台嘅靚女拍檔時,竟然好怕醜,非常搞笑!

鞏俐傳婚變莫名其妙
鞏俐早前喺法國拍攝某牌子染髮劑嘅廣告,𠵱家就喺法國拍新戲《M》。早前有傳鞏俐同內地藝人孫洪雷七月時同遊巴黎。鞏俐一向對緋聞都置之不理,但今次佢經理人被問到呢件事,就複述鞏俐嘅回應話冇咁嘅事,重話唔明點解自從佢嫁咗畀黃和祥後,就不時傳婚變,令佢覺得莫名其妙,咁傳法對佢老公亦好唔公平。
empty
奀妹要工作人員托住先爬到上去。
empty
湯盈盈玩滑梯時咿嘩大叫。
empty
鄭中基
empty
古巨基
empty
鞏俐