俗語話「人有三衰六旺」，做人嘅嘢唔好因一時失意而悲觀，有邊個想過，𠵱家貴為恒生銀行大班嘅鄭海泉，也曾經有過「洗大餅」嘅日子呢！
新城電台噚晚請鄭大班上去，客串做唱片騎師，點咗佢心中兩首至愛嘅歌曲寄意市民，面對逆境自強不息。鄭大班首先點咗音樂劇《學生王子》裏面嘅插曲「DrinkingSong」，佢話呢首歌令佢想番起大學時代無拘無束嘅生活，想當年，大班鄭讀緊大學時正係六十年代尾嘅「火紅年代」，好多大學生走上街頭搞運動，但佢就屬匿埋嘅「蛀書一族」，不過佢話，大學生活係佢一生人最開心嘅時候，因為可以犯錯之餘又可以對社會各樣事物亂咁批評，「𠵱家年紀大咗，有咗好多社會責任，就無咁自由囉！」

點唱至愛勉勵金曲
鄭大班點嘅另一首至愛金曲係著名音樂劇《CATS》的名曲「Memory」，佢話對呢首歌最尾一句「Lookanewdayhasbegun」感受最深，令佢相信「明天是新的開始，明天一定有希望」，千祈唔好有前路茫茫嘅感覺。
佢重回憶起當年飄洋過海留學新西蘭嘅日子，佢話當時佢身上只有幾十蚊美金，一落機放低行李第一件事就係去搵工做，而唯一選擇就係去餐館「洗大餅」，重不時俾啲刀叉整傷隻手流血。佢又話因為無錢，佢唔敢飲咖啡，淨係飲水喉水，諗起都淒涼，但正係挨過鹹苦，令佢懂得一個道理：要成功，就要肯嘗試，「怨天尤人無法解決問題，只有自食其力先至能夠闖出新天地；只要有生存嘅一日，就有機會改變現狀」。


E-mail：[email protected]