喺NBA首圈季後賽直落三場橫掃木狼出局嘅小馬，近日真喺紅到發紫，隊中嘅德國仔奴域斯基啱啱做咗今期《體育畫報》嘅封面，加拿大仔尼殊前日又上咗大衞牙擦蘇嘅《LateShow》做嘉賓，佢哋噚日練波時重揚言對奪標信心爆棚，志在必得云云，簡直唔將龍頭一哥帝王放在眼內。
今次我求大俠都有啲睇唔過眼，小馬啱啱先贏咗季後賽第一圈，離奪總冠軍重有成十萬八千里咁遠；𠵱家就口出狂言話誓要奪標，簡直大言不慚，佢真係當帝王同湖人冇到㗎？而且未開戰就到處辣着晒啲火頭，成為眾矢之的正是兵家大忌；帝王班球員今次肯定扯晒火，嚟緊第一場主場誓要攞小馬嚟祭旗洩憤，你話小馬佢哋係唔係好鬼笨呢？

湯馬臣難當AC正選
飛燕諾嘅前鋒湯馬臣將會喺夏天過檔意甲勁旅AC米蘭，AC米蘭副會長加利安尼重吹晒水咁話羅致呢個丹麥國腳係重建AC米蘭嘅第一步，講到湯馬臣好似好重要。不過，相信心水清嘅朋友都同我求大俠一樣，知道湯馬臣過去都係得個擺字；畢竟，以佢嘅實力又點同AC米蘭嘅射手恩沙基同舒夫真高爭位呢？

文仙尼倘執教拉素危危乎
講開意大利球會，拉素最近就傳會搵曾效力佢哋嘅前球星文仙尼嚟教波，搞到佢哋現時嘅教練沙哲朗尼要去質問拉素管理層。雖