教統局常任秘書長羅范椒芬噚日去巡學校，撞着近日高舉不滿教統局旗幟嘅張文光，加埋牙尖嘴利嘅劉慧卿，點知冇出現預期嘅火星撞地球場面，三個人重有傾有講。
去到將軍澳嘅港澳信義會明道小學，校方安排讀小二嘅陳諾詩做羅太導遊，小妹妹唔知出自真心定有人教路，猛讚「飯焦」皮膚又白又靚，𠱁到佢鬼咁開心。
之後去到可立中學，有位中文教師又勁落鞋油，作咗首七言古詩畀飯焦，首詩分八句，將每句頭一個字串埋就係「羅范椒芬功在教苑」。

可立教師七言詩
羅盡桃李丕基奠，范立可楨報國心。
椒語安有辛辣意？芬馥腔調撫搖琴。
功彪日新促課改，在學莫辭惜分陰。
教局創猷彰遠矚，苑囿菁莪琅書音。
（圖）讀小二嘅陳諾詩做羅太導遊，大家一見如故，唔知有冇交換護膚心得呢？區民傑攝


傳真︰2623-9278
電郵︰[email protected]