港股上周跌近3百點，藉住上周五美股回升，有機做好，恒指再上試萬一。
天鷹電腦（1129）上周五收0.54元，升破三角型，破位要追。天鷹上月中掛牌，初段高見0.77元，較招股價0.5元高出54%，之後急速回落，今次翻炒有迹可尋。
天鷹原本發售1億股新股上市，包銷商本月6日以招股價行使超額認購權購入1500萬股（當日收市價只係0.485元）。包銷商唔會做蝕本生意，必然係有大戶看好公司前景而大手要貨。天鷹流通量有限，掛牌頭10日連續大成交後，突然轉靜，貨源顯已落入強者之手。大戶要加碼，惟有透過包銷商行使超額認購權。
包銷商是誰？就係寶來證券，去年併購漢宇。大成生化（809）上市同後期配售，寶來有份參與。大成高於招股價145%，勁升有辦你睇。
講番基本因素。天鷹業務係產銷電腦機箱、電腦配件及網絡產品，招股預測2001年度（12月結）盈利不少於3000萬元，增38%，每股盈利10.1仙，PE僅5.3倍。今年每股盈利估計再增12%，PE降至4.8倍。

鋁合金箱　獨家生產
產品中有新推出的鋁合金電腦機箱，全中國只有天鷹生產，全球亦只有6家。時下電腦功能愈來愈多，散熱開始出現問題，鋁合金機箱散熱較快，天鷹新產品銷路直線上升，正與聯想（992）及其他國內大型電腦公司洽談，向它們供應新產品，能否接得大手定單，一兩個月內有眉目。天鷹產品一向以外銷為主，藉中國入世，今年開始搞內銷，可大大提高營業額及盈利能力。
台資工業股再度吃香，例如裕元集團（551）兩個月內急升4成半。天鷹由台灣電腦商人王加進13年前在台灣創辦，亦具台資概念。以2002年度8倍PE計，值0.9元，9倍計則見1字頭，係食大茶飯對象。