細奀時代:港股強勢伏味濃 - 阿飛

蘋果日報 2016/11/29 00:00


濠賭股勁升,可是澳門朋友告知,現時在當地要考駕駛的士執照,至少要輪候兩個月,太多賭場職員被裁走,既無特殊技能又無太多低技術職位空缺,唯有揸的士最穩陣。
金融股勁升,可是任職私人銀行高層的朋友,正在為明年跑數而徬徨。以前最主要的生意,是借錢給富豪買債券,一年可以套息六、七厘,做得大而又穩穩陣陣。債券爆煲之後此路不通,亦已經無理由再做,贏就贏幾厘,萬一無錢補孖展的話,隨時一鋪輸兩、三成,根本無得追。
轉投股票的話,美股炒到咁高又怕爆,暫時比較易賣是ELN,但其實回報偏低,股市爆煲一樣會死。所以左度右度,也不知道應該介紹客戶去做甚麼投資。

零售股未算勁升,但相比低位已經好番好多,可是老實的管理層,都會告知經濟只是L型發展,今明兩個季度可能稍好,主因只是之前一年的同期太差,低基數效應而已。美元強勢之下,香港零售復蘇力度只會有限。
做嗰行厭嗰行,現時在股市中,識嗰行就會怕嗰行。從上述幾個例子可看,生意依然難做,股市的上升,主要是投資者寄望公司會復蘇,又或者認為最壞的情況已經過去,即使生意未必復蘇,起碼知道底部在那裏有得博,萬一掉轉頭穿底就斬。
長中短線皆難部署
所以近期股市的勁勢,伏味頗濃。今次走勢和脫歐之後大大不同,脫歐升市的動力來自投資者對回報率要求的降低,但今次卻是大家在債市爆煲之後,覺得局住要追番少少股票博復蘇,明知現實環境之中,世界依然極之難撈,於是大家都只係例飛捧場,買得細,還要分得散,唔望發達,只望唔好俾人賴低,有嘢做好過無動作,扮扮忙,起碼算是曾經盡力而為。
難怪成交只會一路偏低,沒有美麗故事支撐,基本上只是為投資而投資,風險回報完全不合比例。眼前的風險,就有特朗普政策走數,講就天下無敵,做就五折都未必有力,還未計希拉莉不知會不會反口要求在幾個州分重新點票。

看電視新聞訪問途人對深港通的眼法,忽然之間頗有感觸。有八成以上途人對股市不聞不問,電視台煞有介事,其實是帶點諷刺,他們的意見根本一點也不重要。
現在的資產市場之所以難睇難玩,是因為價格只是由邊緣的少數交易所決定,成交越縮越細,形成所謂市價根本完全不靠譜。一個浪打埋嚟隨時劇變,價位牛市,成交熊市,長中短線都難以部署。

阿飛
本欄逢周二刊出