電影《五個小孩的校長》已經上映咗7個星期，成績都好好，《五個小孩》嘅累積入場人次仲高過《復仇者聯盟2》同《狂野時速7》。而戲中嘅五個小朋友，都因為呢套戲而成為咗廣告商嘅新寵兒。

近日五個小朋友珠女（王詩雅）、嘉嘉（傅舜盈）、小雪（何涴瀠）、Jennie（陳麗兒）、Kitty（李詠珊）拍一個服裝品牌嘅廣告，當日個個著晒靚衫，仲笑得好開心，現場嘅工作人員仲大讚佢哋係「五朵小花」。雖然依家佢哋多咗嘢做，但係佢哋嘅家長都覺得小朋友應該以學業為先，所以只會喺好適當時候先會接工作。

至於依身在內地拍攝新片嘅陳木勝對於《五個小孩》持續上映同獲得佳績，佢表示：「愈多人睇即係愈多人接收到戲中正能量訊息，嚟緊母親節，相信大家去睇《五個小孩》都係一個好好嘅家庭節目，雖然我依家喺內地，但我都好掛住戲中五位小演員呀。」