當年今日

股壇瀏覽器:證監出手 莊家遊埠

蘋果日報 2002/08/02 00:00


美股反覆,港股缺乏向方,美國第2季度經濟增長遠遜預期,雖則話格老可能會進一步減息以挽救經濟,布殊又可能將短期減稅措施變成長期稅務政策,增強消費信心,但美國今次若虛不受補,情況可能更為惡劣,對香港亦冇好處。
恒指噚日收報10180,跌87點,成交不足60億元,值得慶幸係滙豐(005)嘅沽空盤已經減少,但i師傅指出先前累積嘅淡倉未平,可能會待滙豐公布業績期間再行空襲。
另外,缸湖傳聞證監向數間經紀行追查細價股大跌是否涉及人為操控。但相信搵唔到乜嘢好料,否則前日沈主席可以大大聲講嘢。據講幾個莊家決定暫時收手,太子已經離港度假,大檸亦放棄供股,出門散心,暫時淡出缸湖。

耀生行未跌完
耀生行(290)7個月內大升12倍至9.20元,結果被證監揭發90%股權落在13名股東手上,耀生行PE高逾1660倍。其實大部份細價股股份都係集中在少數股東手上,股價都係偏高,就算今次唔俾證監踢爆,師奶阿嬸都唔會接貨。此股噚日開始回軟,跌9.8%,收8.30元,後市估計有排插。
華脈無線(499)噚日勁升22%,收9.4仙,公司話冇股價敏感消息可以公布。黑客話,呢間公司上次發2成新股換購香港泰信37.04%股權交易已經完成,當時新股作價10仙,為慶祝單deal順利進行,有人將華脈無線個價弄高至10仙以上。不過,幕後人士嘅實力令人懷疑。
e莉莎話,今日公布業績嘅康師傅(322)業績相當正斗,所以近期股價企得相當硬,可以留意。
阿 虎