李連杰聽日53歲生日，佢趁生日前夕，公佈正式成立李連杰微信公眾號，佢話：「希望透過公眾號，讓大家可以更了解過去、現在、未來的李連杰，知道我的動向、心態和工作計劃。」而杰仔為咗答謝大家對佢嘅支持，由今日起，連續10日，每日會喺連杰俠客營官方粉絲團，抽10個當日關注公眾號嘅幸運兒，得到佢嘅親筆簽名T恤一件。

李連杰話到揀今日呢個日子同大家講呢個消息，因為呢樣係佢其中一個生日願望。佢話：「我的人生都過了50多年，除了希望大家透過公眾號了解我，也希望藉此推廣個人事業、將來路向和慈善公益等事情。」問到李連杰生日係咪同屋企人慶祝?佢話因為自己仲喺北京，所以今年生日唔可以同屋企人過：「幸好得到太太和兩個女兒的明白，我不會特別選生日才慶祝，平常和家人一起生活已經是很幸福的一件事情，我也很珍惜這些相處的日子，生日願望，但願世界和平，少一點的紛爭，最重要還是身體健康。」