香港電台，本港唯一公共廣播機構，被視為最具「公信力」的電子傳媒，為市民提供多元性節目。可惜，近年港台「公信力」每況愈下，給予自由表達意見的空間越見狹窄。
港台「二哥」吳錫輝在港台度過三十三個寒暑，06年8月功成身退。
眼見當前動盪失控亂局，最具公信力的公營廣播機構落得如斯田地，二哥黯然神傷，他對港台失望，對廣播處長鄧忍光無望，惟有寄望生生不息的新生代，向惡勢力說「不」。
撰文：楊潔雯

鄧忍光電郵《頭條新聞》製作團隊一干人等，交代如何「腦震盪」，可笑！要求為教育局長吳克儉及國民教育科委員會主席胡紅玉拒絕出席《城市論壇》而「擺空凳」的員工進行檢討，可恥！港台「二哥」吳錫輝為種種可笑可恥的事不吐不快。
日前相約前副廣播處長吳錫輝在九龍塘Billy Boozer酒吧接受訪問，到了預約時間五點鐘吳錫輝還未出現，到五點零一分來電，他從容不迫、禮貌地說：「唔好意思，塞車，我坐緊的士，不過我要上去廣播道兜個圈先，我過開嚟呢度，要懷緬一下先！」十五分鐘後，一身休閒便服的吳錫輝，跟酒吧老闆娘打完招呼後，坐下劈頭第一句便說：「你叫我Raymond， 唔好叫我吳生，我打你㗎！港台任何人都唔可以叫我做吳先生，毛管戙，好乞人憎。」副處長變成Raymond，感覺親切。

「唔好以為港人盲」

訪問先由Raymond拉攏張學友公開對港台表態開始，他說：「我send咗個message畀學友，我話：『我是港台出身的，血脈相連，如果你肯講幾句公道說話，捍衞香港核心價值，多謝你！但係如果有困難，咁就忘記我上述所言。』」我知個個都要返大陸搵食，點知學友嚟到，講多咗一倍有多，我真係好感動，佢之後仲問我有冇準備聲明，我真係冇，大佬我打單泡出嚟，以前梗係有人幫我準備啦！所以我好開心又欷歔，學友真係當我大佬咁！」
好一句「血脈相連」，Raymond又如何不心痛！外間的不滿情緒，矛頭直指現任廣播處長鄧忍光，「二哥」說：「你同我寫一句，我唔識佢，唔評論佢。」換個問題問他，對現任處長有甚麼期望？二哥一撻即着說：「我唔期望佢為港台可以做到爭取公營廣播機構應有身份、形象同價值，因為佢已經畀我一個可疑形象，你揼施永遠擺明係政治整頓，同我講嘢？搞清楚件事先，perception is reality鄧竟成講過嘅，唔好以為公眾係容易被瞞騙。」二哥緊接將話題帶到港台新生代，他雀躍地說：「我好開心，港台新生代，生生不息，我再講一次，你們是奄奄一息，自己對號入座啦！港台係有新生代，點會冇success？」二哥果然寶刀未老，然後來招含沙射影，當下他一再重申港台的基本理念，就是捍衞香港的核心價值：「就係話你作為一個媒體中人，尤其係一個公營廣播機構，我唔會理係乜嘢級數，你一定要有cost value，我哋係向公眾交代，大哥！搞清楚個理念先，其他唔使講啦！唔好以為香港人係盲、聾、蠢嘅，真係搞錯晒！總之我對港台若干人想升官發財嘅心態，好痛心。我真係不吐不快，你哋自己選材啦！」鄧處長，聽到未？

論現任處長告一段落，再談先後與二哥共事的兩位處長——「惡大姐」張敏儀和「落荒而逃」朱培慶。
Raymond跟張敏儀共事，感情時好時壞，他說：「工作上大姐係一個有精神感召嘅領袖，但係佢有時脾氣好大，佢會半夜三更打畀我，兩點九大姐打嚟『吳錫輝有冇聽節目？剛才個DJ播首歌好似唔係好appropriate。』我咪哦囉。First of all，佢係精神領袖，worst of all你兩點九叫我起身，我當時年輕，唔使屙夜尿，你嘈醒我點瞓番呀？哈！我都係第一次呻出嚟。」

封朱培慶最佳主席

至於07年因被撞破與艷女CoCo密會的朱培慶，無奈申請提早退休，事發時Raymond身處北海道與家人度假，他說：「我見到報紙揼咗佢四日，我都知死喇！我只係覺得好惋惜，當然所有女性都會覺得佢去滾，但係佢對我來講，係亦師亦友嘅好朋友。除咗大姐之外，我係好尊重朱培慶，我諗佢都唔知，我唔係同佢講說話，我同佢喺電台嗰七年，真係好唔開心，係難捱嘅七年，我同佢點樣辛苦捱過，或者佢點解犯錯，可能嗰啲壓力都係來自嗰七年，佢又唔同人講，甚至連我都好少share。我大癲大肺，乜都同人講，佢性格唔同我，佢內斂，我外露，諗番轉頭佢咪雙倍辛苦。」
無論是壓力促使，抑或是慾念推使，一念之差，令朱培慶從高處墜下。在Raymond心目中，朱處長亦有很多個人之處：「佢係好有魅力，但係唔散出嚟，我之前都講過幾次不過冇人寫，佢係一個去到任何international conference嘅最佳chairman，英文好，思路清晰，can lead the discussion，上台一開波，我就可以瞓覺。所以佢做唔到Asia Pacific Broadcasting Union嘅Secretary General（亞太廣播聯盟秘書長），我覺得係亞洲損失，又可能係因為嗰件事，佢真係好用功but so unfortunate。」一失足成千古恨！

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/