美股周三大挾淡倉，港股噚日亦勁升282點，收報11780，成交近130億元。ｉ師傅話有30至40億元新錢入市掃貨，令唔少衍生工具商要入市對沖。Cookie話，美國佬今次係特登喺中資放大假時玩嘢，等佢哋放完假要喺高位補倉。
科建集團（563）宣布大股東賣殼成功。原來買殼公司由齊翔（735）主席兼大股東黎亮所持有。黎亮等人以每股4.9仙收購齊翔9.8億股，約持有70％股權，其後股價翻幾番，噚日收市報0.128元，即係話黎亮等人已經帳面獲利7742萬元。據黑客話，齊翔近期已經冇咩鑊氣，加上黎亮又搵到新殼，好可能會減持，甚至出售齊翔所有股權都唔定。齊翔點發展，現時都好難確定，不過科建就肯定有鑊氣。

和記港陸似散貨
和記港陸（715）噚日早段本來回軟逾3％，跌破0.80元，但其後傳出公司管理層曾向證券界放風，話公司可能會成為和黃（013）電訊設備製造旗艦，又可能同DoCoMo合作云云……，消息傳出後股價又再大幅急升，最高升至0.96元，其後收0.88元，成交達到3.5億元，好似已經有人散緊貨。
金禾國際（090）早前因被投資者以重大不利因素為理由，終止認購新股協議，一度被人斬倉。現在又話要2供1，每股供1.6仙，最慘重係大股東唔單止唔包銷，重唔肯按比例供股。原本大股東應該要供10.9億股，但𠵱家只肯供6.2億股，擺明想減持，大股東都縮沙，重可以搵邊個去供股呢？此股噚日急挫26.7％，收4.4仙。
阿　虎