尋覓財政司遊戲，玩玩吓變成輪流表態唔肯做嘅遊戲。表態唔做者，一種係真係唔想做，另一種就係根本冇份，不過既然有人傳係自己，於是主動否認，冇人搵都攞個彩。
繼鄭海泉、梁定邦、鄭維健、陳坤耀、唐英年、葉澍堃話明唔想玩，葉局長重想放假之後，據說係特首第一朋友、一日通幾次電話之利豐大老闆馮國經，噚日亦發聲明，表明自己「無意加入特區政府出任全職職位」；又話「會繼續積極履行目前所擔任公職之職務，為香港市民服務」。

公職多籮籮
馮博士現時之公職真係唔少，有機管局主席、港大校務委員會主席、司法人員推薦委員會成員、策略發展委員會成員、亞太經合組織商業顧問委員會代表；如果佢真係肯做財司，要搵人填番呢批空缺都幾煩。
早前，八方聽高人話，馮博士剛剛買咗隔籬同樓上相連單位打通，裝修得好靚，而佢就最怕搬屋云云；放到呢的風，又真係推得唔容易，肯定係第一種人。
不過，馮博士唔做全職，係咪可以做兼職呢？特首盛意拳拳，入行會替田北俊，都算冇拒人千里。至於財司，最後可以搵學者搵打工皇帝做，再唔係，叫阿爺迫煲呔不恥下兼、迫任總忍痛減薪，亦係可行之法呢。


傳真︰2623-9278
電郵︰[email protected]