特區新時代，李少光由入境處空降廉署，引起一些暗湧。前日佢第一日返工，喺廉政專員嘅辦公室畀記者影相。佢話，以前入境處長間房有海景，𠵱家變咗山景，亦唔錯。
其實當日李專員未返廉署，先到商台，上鄭大班個節目。有人聽到李少光把聲覺得好奇怪，問八方點解，李少光咁畀面，且咁夠膽上大班節目？事關大班對廉署不客氣係人都知。

也是港大「七三」生
世事無絕對嘅。八方知道，大班同李少光係中學同學。大家都係九龍工業中學第一屆畢業生，不知幾老友。講起九工，除咗名嘴鄭大班，另一個大班鄭海泉亦係該校出品，重有渠務署署長張達炯、恒基地產前董事溫文儀、理工工業中心總監黃河清、法律界嘅楊漢源，同「達明一派」嘅黃耀明等等，全部都係九工畢業生，真係猛人多籮籮。所以笑九工學生係籮底橙嘅人，真係要反省一下。
講番李少光，鄭大班話，佢細細個已經好乖、好聽話，之後考入港大讀電機工程，七三年畢業。畢業之後，李少光走去考入境處，由兩粒花嘅入境主任，一直升到處長。八方笑問鄭大班將來會唔會對老廉特別留情？大班即刻話唔會客氣，重話，商台有名你叫：叫問責電台！講笑啫佢，大班咁念舊，老廉班公關定噃。
至於「七三」，八方都寫過港大旺七三，當紅高官如阿松、馬仔、葉澍堃、廖秀冬都係七三仔女，原來漏咗李專員。但佢一聽見八方提起此事，馬上話自己冇馬房喎。



傳真︰2623-9278
電郵︰[email protected]