當年今日

投資特攻隊:睇直播 捧阿積士 - 蘋果波神

蘋果日報 2006/10/13 00:00


今次投資特攻隊轉吓口味玩荷蘭足球,重心推介榜首大戰,將喺周六深夜由無綫直播嘅阿積士主場擊潰格羅寧根;冷選,博極頹嘅韋斯咸作客殺低盤王樸茨茅夫。 文︰蘋果波神
荷甲聯水準雖然一般,但亦係唔少球迷心儀嘅聯賽,皆因入球多兼4大強隊近季經常出現大勝波膽;然而今屆形勢有變,強隊大量流失主力,帶挈球迷贏錢比率大幅下降,不過一直堅持重用新秀嘅阿積士仍維持勁勢,今屆依然追得過。
老將來投愈踢愈順
今周這支荷甲聯一哥迎戰只因得失球不及阿爾克馬爾、排第3位嘅格羅寧根,點計都係熱捧阿積士W同埋「主勝」啦!阿積士今屆喺夏天補入咗比賽經驗豐富嘅前國腳級球員,好似中堅史譚、中場加比、羅渣同埋前鋒堅尼夫佩雷斯等,配合陣中一班質素奇佳嘅球員如史奈達、希汀加及史基倫保等,目前以6戰得15分居首;計「讓球盤」有8成半贏盤率。
喺周六迎雖然續有射手亨特拉爾(Huntelaar)因傷缺陣,不過其實上場聯賽對住成日剋住晒嘅烏德勒支時,綽號「獵人」(Hunter)嘅亨特拉爾已經冇上陣,結果仍能以3:2勝出;其實隊中其他攻擊球員好似賴恩巴布、羅沙里斯同羅辛貝治咁一樣唔失禮,今場絕對有力攻破格羅寧根大門。
格羅寧根訪阿積士往績差
格羅寧根今屆可以躋身前列,絕對係因為主場表現好,佢哋喺有「綠教堂」之稱嘅主場歐洲堡球場比賽,真係遇神殺神;可惜佢哋係名副其實嘅「門口狗」,上屆聯賽作客更只得3勝5和9負。另外,佢哋近9次到訪阿積士全部落敗,相信今仗難逃聯賽首次輸波嘅厄運。
韋斯咸「物極必反」
博冷向番英超聯埋手,心水嗰場係樸茨茅夫主場對韋斯咸,博受讓半球嘅韋斯咸下盤兼冷W。特攻隊喺英超揭幕戰曾貼過呢隊波打敗查爾頓得手,可惜加入「阿根廷孖寶」後衰到無人有,計埋歐協盃在內已連輸5場,仲要連1球都入唔到;但所謂「物極必反」,衰咗咁耐都係時候反底贏吓盤。
撇開「孖寶」唔講,韋咸嘅人腳絕對唔差,若果哈利列納出番森莫亞拍希活打雙箭頭,絕對有權喺老樸身上攞分。老樸自從畀保頓隊爆輸0:1後,道真氣洩晒,之後作客熱刺再輸1:2;講真老樸實力唔強,淨係靠道氣頂住,𠵱家罩門被破,衰多1場唔奇,要讓波捧唔過,捧韋咸下盤兼冷W啦。
投資特攻隊金句
荷甲聯主攻不守,入球多,值長追強隊單W兼𡁻埋讓球主客和嗰瓣外,小敲大勝波膽分分鐘有意想不到嘅收穫。
empty