睇CNBC直播「安隆案之安達信銷毀文件」，國會議員JamesGreenwood（共和黨）一開波就話：「安隆打劫銀行，安達信在外用車接應，你，鄧肯先生，就係司機。」議員把口好厲害，想話聽吓安達信前合夥人鄧肯（DavidDuncan，已被炒魷，佢就係下命令銷毀文件嗰位仁兄）點樣答，但律師在旁不斷提醒，鄧肯一於引用美國憲法第五修正案（TheFifthAmendment），全部問題都唔答，於是主席叫佢立即離場。
大公司做假數，向銀行借錢、向股東集資，事實上真係形同打劫。銀行、股東、股民全部蒙受損失。但核數師係接應賊車嘅司機？諗都未諗過。呢位共和黨議員呢個譬喻，真係一箸夾中，夠晒辛辣。
安達信平時聘請大學生、MBA，以專請精英嘅精英為傲。會計L當年喺英國讀CA（特許會計師），讀完之後去倫敦安達信見工，見佢嗰位合夥人好冷酷咁話：「畀你五分鐘說服我點解要請你？」會計L講足五分鐘，之後再答其他問題。合夥人話可以請佢，但會計L拒絕，後來去咗羅記。最近見面，大家話題轉到去安隆，會計L先至講番呢個故事。問佢點解當年唔去好多人夢寐以求嘅安達信職位，會計L話：「我覺得佢太過自信，好沙塵，唔啱我，但無可否認，入面有太多叻仔。」叻都冇用吖，四位安達信要員俾國會議員問到口窒窒，窘態百出，可憐復可嘆也。